Recomendacións para combater a calor intensa, que seguirá en Galicia durante varios días
No caso de sufrir esgotamento ou un golpe de calor, recoméndase solicitar axuda médica urxente chamando ao 061
Nunha entrevista no Bos Días da Televisión de Galicia, o médico Sergio Cinza detallou as principais recomendacións para afrontar sen riscos para a saúde estas xornadas de intensa calor que vai rexistrar Galicia.
Uns consellos especialmente importantes para os grupos máis vulnerables: maiores de 65 anos, nenos e bebés, persoas que padezan enfermidades cardiovasculares, respiratorias ou mentais e aqueles que traballan no exterior.
Para evitar incidencias, as autoridades insisten nunha serie de consellos:
-Beber sen esperar a ter sede, sobre todo auga e zumes de froita lixeiramente fríos.
-Evitar bebidas quentes, alcohólicas, café, té ou cola e as moi azucradas.
-Evitar as comidas copiosas e aumentar o consumo de ensaladas, verduras e froitas.
-Usar roupa de tecidos naturais, lixeira e folgada, de cores claras, chapeu, lentes de sol e cremas protectoras solares, así como calzado fresco, cómodo e transpirable.
-Permanecer en espazos frescos e ventilados e estar á sombra na medida do posible.
-Evitar as actividades ao aire libre nas horas de máis calor e reducir a actividade física.
-Vixiar que non queden nenos nin anciáns no interior do coche cos portelos pechados cando estacionemos o vehículo.
E, por suposto, no caso de sufrir esgotamento ou un golpe de calor, recoméndase solicitar axuda médica urxente chamando ao 061.
🌡️ A @Xunta amplía a alerta vermella por episodio de calor a 138 concellos
— Consellería de Sanidade (@SanidadeXunta) July 2, 2026
⚠️ As temperaturas serán altas en toda Galicia e prevese que as alertas permanezan activas durante varios días
🔗 https://t.co/JzrqgF0FQQ pic.twitter.com/S1xWUTZurQ
