Ratas, humidade, incendios e ocupas: a situación que denuncian unhas veciñas de Neda

Un edificio en ruínas é o motivo principal de preocupación dunhas veciñas da rúa Sobre a Vila, en Neda, que levan varios anos denunciando unha situación de risco, tanto para a saúde dos propios veciños como para a vida dos que pasan pola zona.

Un auténtico pesadelo segundo comentan. O edificio continúa sen tellados e coas vigas ao aire tras un incendio sufrido en marzo de 2023. Os veciños apuntan que cadrou coa estancia dun ocupa na casa. Reiteran, ademais, que hai ratas, que vivir alí é insalubre, que os nenos enferman a causa da humidade e que hai un continuo risco de derrubamento. 

"Isto é un perigo. Aínda que haxa uns valos, van vir temporais, como os que veñen en Galicia, e pode saltar unha tella, unha viga... e calquera que pase pode ter un accidente. Á parte diso, aos edificios colindantes estanos causando humidades, filtracións...", comenta Sonia Gonzalo, unha das veciñas.

"Hai mofo, os mobles desfanse pola humidade, os nenos teñen tos continuamente por estar respirando iso...", apunta Liliana González, a outra veciña.

Dende o Concello aseguran que xa tomaron medidas, que inclúen dende peticións de demolición a multas coercitivas ao propietario do edificio. De seguir sen resposta, non descartan que sexa a propia Administación local quen se faga cargo da demolición.