Investigan unha nova vaga de roubos nas proximidades da Hípica, na Coruña
Hai 15 denuncias presentadas por danos en vehículos e pola falta de obxectos persoais de pouco valor
Así quedou un dos vehículos estacionados no paseo marítimo da Coruña á altura da Sociedade Hípica. Os propietarios atoparon os cristais esnaquizados e botaron en falta algunhas pertenzas de escaso valor.
"O paseo polas noites chega un momento en que non hai unha alma", di un veciño. "Aquí hai que pensalo para aparcar. É unha lotaría", asegura un condutor.
Esta zona do paseo marítimo é moi frecuentada polos veciños da zona para estacionar o vehículo ante a falta de aparcadoiro no barrio.
"Eu vivo nesta zona e deixo o coche aquí sempre. Tiven a sorte de que non me pasou nada. Pero tampouco deixo nada dentro do coche", afirma un propietario.
En total son máis de 15 as denuncias que se presentaron ante a Policía Nacional, que agora investiga os feitos. Non é a primeira vez que sucede. O mesmo modus operandi deixou unha vintena de coches con danos nas proximidades da Domus hai varias semanas.
"Empezaron na Casa do Home e agora veñen por esta zona. Por baixo do Cemiterio e na Hípica", asegura un veciño.
Din fontes policiais que este tipo de delitos adoitan estar relacionados con persoas que buscan un xeito rápido de facerse con algúns cartos.
