As aulas galegas incorporarán 1.113 docentes novos este curso
Son 385 novos mestres en primaria, 665 en secundaria e 63 de sectores singulares da FP
Aprobaron a oposición no verán, colleron destino provisional e están listos e listas para incorporarse ao sistema educativo. Son os 1.113 novos docentes que se repartirán en 190 concellos galegos este curso que empeza.
No acto institucional de benvida, o conselleiro de Educación quixo agradecerlles o esforzo e a vocación, e describiu os docentes como motores do sistema educativo. "Creo que grazas ao gran traballo e á gran motivación do profesorado, o sistema está dando pasos firmes", dixo Román Rodríguez. "Galicia está á vangarda en moitísimas variables educativas, e así o din os informes PISA ou os informes comparados con outras comunidades autónomas", engadiu.
O curso arranca con 385 novos docentes fixos en Educación Infantil e Primaria, 665 en Secundaria e 63 de sectores singulares da FP, en oito especialidades. As aulas volverán encherse o día 8 de setembro, con cousa de 4.300 alumnos menos que o curso anterior.
