Queixas en Quiroga pola perigosidade dunha estrada
Veciños de varias parroquias incendiadas en 2025 esixen medidas urxentes para evitar que as enxurradas sigan arrastrando o firme
Os veciños das parroquias de Cereixido e Vilarmel, en Quiroga, cortaron a N-120 para protestar polo estado de abandono en que se encontran as súas aldeas. A raíz dos incendios de 2025, a estrada que lles dá servizo está cada vez máis degradada, ata o punto de que resulta perigoso circular por ela. En especial cada vez que chove, posto as enxurradas están a arrastrar o firme e mesmo hai risco de corremento de terras.
Para evitar que a montaña se derrube e chegue a haber unha desgraza, os afectados esixen que se tomen medidas urxentes. Reclaman que se repare o firme alí onde xa foi arrastrado e que se aseguren as ladeiras, que quedaron desprotexidas tras os incendios.
Aínda que a estrada en perigo é de titularidade municipal, a veciñanza afectada demanda a implicación de todas as administracións públicas.
