Veciños de Bamio, en Vilagarcía, piden máis batidas para reducir o número de xabarís que cruzan a PO-548

As leiras fozadas dan boa proba da presenza habitual de xabarís en Bamio. Os veciños din que xa non plantan millo nin patacas por culpa deles, pero que agora lles comen a froito ou canto atopan.

Ademais resaltan a súa habilidade para saltar os valos e das leiras e para manter as súas rutas habituais. Pero amais dos estragos nas leiras o que lles preocupa é o perigo que supoñen nas estradas, sobre todo na PO-548, a estrada litoral de Vilagarcía a Pontecesures que ten unha grande intensidade de tráfico.

"Os coches van a 90 ou a 100, e sáeche un bicho deses e como trates de evitalo pode haber mortes", aseguran. 

Un sinal luminoso alerta de que é unha vía perigosa, polo número de accidentes que se rexistraron, o último esta mesma semana. Jesús sabe das consecuencias, porque moitas veces os coches acaban no seu taller.

"Cada mes un coche ou dous veñen seguro. Se o bicho é pequeno dánalle máis por baixo, o radiador e o circuíto da auga, pero se é grande xa ten outros danos, capós, defensa, faros...", conta.

Unha reparación pode chegar ata os 4.000 euros, un custo que non sempre asume o seguro. "Hai xente que ten seguro contra danos cinexéticos e cúbrelle, pero a terceiros non cubre", explica Jesús.  Por iso pide que se fagan máis batidas.