Protestas polos "recortes" nos centros educativos de Galicia

A Plataforma Galega en Defensa do Ensino Público convocou para o vindeiro mércores varias accións de protesta para mostrar o seu malestar ante os recortes de profesorado, as condicións laborais e os altos cocientes de alumnos por profesor en aulas.

A plataforma, na que está integrada a CIG,  convocou as familias, alumnos e profesores a diversas concentracións ás 11:30 horas do próximo día 7 en todos os centros educativos. Tamén haberá unha concentración ás 11:30  fronte á Consellería de Educación.

O secretario xeral de CIG-Ensino, Suso Bermello, dixo este luns que non se descartan outro tipo de mobilizacións se o Goberno autonómico non responde ás demandas da comunidade educativa.

Durante a presentación, Bermello sinalou que este novo curso académico comezará cuns 717 docentes menos con destino provisional, un dato "publicado pola Consellería", que, doutra banda, non supón unha cifra "real de recortes".

"Non podemos saber exactamente cantos docentes perdemos este ano e non o podemos saber porque non hai ningún tipo de transparencia por parte da Consellería", expresou Bermello.

Bermello matizou que o ano pasado a cifra total de recortes foi de 869 profesores, dos cales a de destinos provisionais foi de 528.

 

Os grupos da oposición critican que a Xunta aínda non teña os currículos escolares

O voceiro parlamentario do PSdeG Luís Álvarez considera “lamentable” que sexa o propio conselleiro de Educación o que estea a xerar “incerteza” sobre o arranque do curso escolar pola súa incapacidade para aprobar os currículos a tempo, a pesar de que outras comunidades si o fixeron.

O vicevoceiro parlamentario do BNG Manuel Lorenzo queixouse de que a Xunta prescinda de ata 800 profesionais para o vindeiro curso e reprochoulle tamén non ter feitos uns currículos claros mentres bota as culpas ao Goberno do Estado. 

O voceiro parlamentario do PPdeG Pedro Puy negou este luns o recorte de profesorado que denuncian os grupos da oposición e enmarcou estas acusacións nun “intento político de xerar ruído”.