Pedrafita celebra a primeira feira dende o corte total da A-6

Pedrafita do Cebreiro celebrou a súa primeira feira dende que se desviou a circulación de vehículos en ambos os dous sentidos pola estrada N-VI. Ademais de multiplicarse o tráfico rodado, nesta xornada incrementouse o tránsito de peóns a cruzaren pola arteria principal da vila.

Ante o aumento do tránsito de vehículos e de persoas, nesta xornada a Garda Civil reforzou a súa presenza en Pedrafita. Esta medida súmase a outras postas en marcha nos últimos días, como a limitación de velocidade a 40 quilómetros por hora ou a instalación de cámaras de vixilancia.

Luis Rodríguez Castro, tenente do destacamento de Tráfico da Garda Civil de Lugo: "É como cando se producen as nevadas, que estamos máis pendentes desta zona. De momento estamos tendo sorte, sen incidencias".

Doutra banda, tras dúas semanas transcorridas dende o corte total da A-6, os transportistas comezan a detectar avarías en relación co desvío da ruta.