Barallobre inicia por primeira vez unha campaña de extracción de vieira para venda en fresco

Este luns arrancou unha campaña histórica na confraría de Barallobre, en Fene. "É histórica porque é a primeira vez que imos vender en fresco aquí. A empresa xa o viña facendo, pero aquí, na confraría, é novidade", explica Jorge López, o patrón maior da confraría de Barallobre.

E o seu prezo tamén será histórico. "Temos un prezo de 4.75 euros, que nunca se logrou. É verdade que ten que ser unha vieira de 13 centímetros; e 4,25 para a vieira de 12 a 13 centímetros", engade Jorge López.

Durante 22 xornadas, 12 embarcacións recollerán 1.600 quilos de vieira. E neste inicio de campaña cumpriron coas expectativas. "Collemos os topes nun tempo bastante aceptable"; "É unha vieira moi boa, grande, de moi boa calidade".

Explican amais que non van extraer exemplares e tamaño menor de 12 centímetros.

"Nós o que estamos intentando é coller a máis grande posible. O tamaño mínimo en Galicia é de 10 centímetros, pero o noso mínimo é de 12. Isto significa que vai haber máis reprodutores e no futuro imos ter máis vieira", di Jorge López.

Ao final da campaña, o 26 de marzo, contan con ter recollidos 35.200 quilos deste bivalvo.