Preto de 13.000 galegos examínanse desde este martes da PAU
A nova proba de acceso á Universidade trae este ano importantes novidades, haberá un único exame nas distintas comunidades e máis probas competenciais
Os aspirantes terán que levar o DNI e o resgardo de pagamento da matrícula para acceder ás probas
É a selectividade de toda a vida, nos últimos anos coñecida como ABAU, e a partir deste ano como PAU, proba de acceso á universidade, para unificar a nomenclatura en todo o territorio español.
Deste xeito, entre as novidades, os estudantes terán, nas mesmas datas, un único exame nas diferentes comunidades, desaparecendo a opcionalidade. Ademais, terán que responder a todas as preguntas, para promover que se estude todo o temario, e non só unha parte.
Penalizaranse especialmente as faltas de gramática e ortografía. Poderán restar ata un 20 % nas notas de galego e castelán.
As probas estrutúranse en dúas partes: unha obrigatoria, que son cinco exames de materias comúns, e unha parte voluntaria, con ata catro materias adicionais para subir nota.
A nota de admisión á universidade será a suma de varias partes: o 60 % é a nota media do bacharelato, o 40 % restante é a nota media das probas obrigatorias. A esa cualificación sobre 10 poden sumar ata 4 puntos máis cos exames realizados na parte específica.
En Galicia examinaranse, a partir deste martes e ata o xoves á unha da tarde, 12.946 alumnos, 20 menos que o ano pasado. Estarán repartidos en 35 facultades, institutos de secundaria e escolas universitarias.
Documentos obrigatorios para acceder
E ollo que para poder facer as probas é obrigatorio presentar unha serie de documentos, algo que non todos os aspirantes saben: terán que levar o DNI e o resgardo de pagamento da matrícula.
Nela so estarán permitidos bolígrafos ou plumas de cor negra ou azul e materiais específicos para as distintas materias, como poden ser as calculadoras, dicionarios ou os materiais para os exames de artes plásticas.
As cualificacións provisionais coñeceranse o 12 de xuño e as definitivas, tras as revisións, o día 19.
Na xornada previa puidemos ver os vehículos que transportan os sacos cos exames. Furgóns blindados para custodiar un contido que non se pode desvelar ata o mesmo momento en que empecen as probas. Só tres persoas en Galicia coñecen os exames.
Levan desde finais de abril custodiados nun búnker na Cidade da Cultura e hoxe repartíronse entre as 36 comisións delegadas onde se van facer as probas.
