Preocupación entre comerciantes do Barco de Valdeorras por unha vaga de roubos en negocios

Os comerciantes e empresarios do Barco de Valdeorras denuncian que están a sufrir unha preocupante vaga de roubos e din que lle está afectando gravemente ao comercio local. 

Desde a Asociación de Comerciantes do Centro Comercial Aberto aseguran que levan contabilizados entre 15 e 20 roubos en tendas e tamén nalgún garaxe. Din que o peor son os estragos que sofren nos seus establecementos. Por iso piden a apoio da cidadanía para que colaboren con eles e coas forzas de seguridade para frear estes continuos roubos. A Garda Civil anda tras a pista dos ladróns.

A tenda de Rita, situada na zona vella do Barco de Valdeorras, sufriu dous roubos seguidos a mesma semana, o terceiro que sofren nos últimos meses. A última vez romperon o cristal da porta, desta volta forzaron a ventá.

Hai preocupación entre os comerciantes porque din que levan sufrindo unha vaga de roubos nas últimas semanas. Aseguran que o peor son os estragos que deixan nos locais máis que os cartos que levan. 

"Estás preocupado porque chegas pola mañá e ves o estrago, e dis, outra vez, a miña cristaleira, non me roubaron nada, pero teño que colocar todo, dar parte ao seguro", di o presidente do Centro Comercial Aberto do Barco, Jacobo Arias.  

Desde o Centro Comercial Aberto, que agrupa un cento de comerciantes do Barco, pídenlle á cidadanía apoio para o comercio local. Mercando nas súas tendas, pero tamén colaborando coas forzas de seguridades se ven algo sospeitoso.

O subdelegado do Goberno en Ourense tamén se solidariza cos comerciantes barquenses e asegura que a Garda Civil anda xa tras a pista dos ladróns. 

"Os servizos da Garda Civil e a Policía Xudicial da Garda Civil están enriba do asunto. Teñen información e están desenvolvendo o seu traballo", asegura Eladio Santos, subdelegado do Goberno en Ourense.

O comercio é un dos piares económicos do Barco de Valdeorras e, por iso, desde o Concello xa tomaron medidas para reforzar a seguridade na vila.