Preocupación en Verín por actos vandálicos en coches estacionados en aparcadoiros públicos

En Verín andan preocupados polos continuos actos vandálicos que están a sufrir nos coches que quedan estacionados nos aparcadoiros gratuítos da vila. Din que hai quen se dedica a picar as rodas e danar os vehículos. 

Carme é unha das veciñas de Verín á que xa lle rascaron o coche tres veces.

"Mira, todo isto, o capó. Raiáronmo dúas veces, que o tiven que pintar e que me valeu o seu diñeiro pintalo. E agora raiárono deste lado, do outro. Cinco ou seis raiaduras menos profundas e este é moi profundo. Quería pintalo pero de momento non o pinto".

"Onte no parque de estacionamento do Mercadona a primeira hora da mañá cando fomos aparcar o coche, había dous coas rodas picadas", asegura outra veciña.

Estes actos vandálicos están a suceder nos aparcadoiros gratuítos do Concello. Din que son continuos, e por iso algúns veciños colocaron carteis para alertar a veciñanza e disuadir os autores. 

Cartel en que alertan dos actos vandálicos.

A veciñanza está preocupada e pide máis vixilancia policial nestas zonas. 

"A verdade hai moitísimo vandalismo, e vixilancia ningunha". "Algo máis de vixilancia igual fai falta".  "Ningunnha, e de noite só hai unha luz alí nun pau, e isto é a boca do lobo". 

O Concello de Verín é coñecedor deste problema, pero por falta de persoal non hai Policía Local polas noites na vila. A veciñanza pide unha solución.