Picos de consumo non rexistrados poñen en risco o abastecemento de auga de Esgos
Este verán, o depósito amenceu baleiro varios días sen que se xustifique polo consumo dos contadores
O Concello pide a colaboración veciñal para dar con posibles fugas ou usos indebidos
Podería chegar a haber restricións porque coa seca resulta máis difícil manter os niveis operativos no depósito
O depósito de auga que abastece o núcleo de Esgos ten capacidade para uns 230.000 litros de auga. É máis ca dabondo para abastecer o consumo doméstico, malia que a poboación local se duplica cada verán.
Pero este mes de agosto empezaron a fallar as contas e houbo varias fins de semana que quedaron sen auga nas casas da zona máis alta. Carlos Godoy, o responsable do servizo municipal, di que atoparon o depósito baleiro ata en tres ocasións.
"Non nos coinciden os litros que entran e saen do depósito cos consumos domiciliarios", asegura.
Os responsables da traída están rastrexando a rede e poñendo contadores por treitos para detectar por onde se vai a auga. Pero, amais do rastrexo, desde o Concello piden a maiores a colaboración veciñal para desvelar o misterio antes de que a fuga e a seca obriguen a cortar a subministración.
"Pedimos colaboracións porque os veciños as veces ven as cousas mellor ca nós", din.
Coa seca, cada vez é máis difícil manter un nivel óptimo de auga nos depósitos
