Os veciños de Baiona opóñense á construción do novo porto deportivo
A colisión da barreira anticontaminante por mor das obras provoca descontento entre a veciñanza
Os residentes exixen máis medidas de protección medioambiental
Portos de Galicia sustenta que as construcións contan con garantías ecolóxicas
Nas últimas horas reparaban a barreira anticontaminante instalada por mor das obras de recheo que permitirán ampliar o porto deportivo de Baiona. O valado rompeu como consecuencia do temporal enchendo a baía de lodo, provocando un gran malestar da veciñanza.
Rafael Lores, voceiro da Plataforma Salvemos Santa Marta manifesta as súas preocupacións a nivel medioambiental e indica que a barreira xa non supoñía unha gran protección pero tras o incidente o contexto actual é máis alarmante.
Portos de Galicia asegura que se están a extremar as medidas de protección e que a empresa que executa as obras non depositará material mentres a barreira non estea operativa. Porén para os membros da plataforma que se opón a este proxecto as medidas ambientais deberían ser máis exhaustivas.
Así, os veciños de Baiona opinan que esta tentativa de ampliación do porto supuxo un agravio para as súas rías, praias e para o ecosistema xeral, sendo ademais moi prexudicial para a pesca.
Así a todo, Portos de Galicia reafirma que as obras contan con todos os permisos e garantías medioambientais e que os materiais depositados non son contaminantes. Mentres a Plataforma Salvemos Santa Marta segue a denunciar o que considera un atentado medioambiental e a privatización dun espazo da cidadanía.
