Manifestación de médicos en Santiago para esixir medidas que poñan fin a folga
Manteñen o pulso con Sanidade tanto a nivel autónomico como estatal. Á consellería pídenlle melloras nas condicións laborais e ao ministerio un estatuto propio
Mentres, os centros sanitarios galegos reorganízanse e estudan como compensar as citas afectadas polas protestas. En dúas semanas suspendéronse 43 mil consultas
Médicos de toda Galicia manifestáronse este sábado en Santiago de Compostela, convocados polo sindicato O'Mega, en defensa da "dignificación" da sanidade pública e para reclamar á Xunta que negocie as medidas que reclaman para poñer fin á folga.
Os facultativos percorreron as principais rúas do centro da capital galega detrás dunha pancarta co lema "Pola nosa sanidade" e corearon consignas como "Paciente, escoita, esta é a túa loita", "Hora traballada, hora cotizada" ou "Non é vocación, é explotación".
Os médicos e facultativos tamén reclamaron coa súa manifestación, neste caso ao Goberno central, a redacción dun estatuto marco propio, algo que xunto ás reivindicacións que se fan á Xunta orixinan a folga que o luns comezará a nivel estatal.
A manifestación continuou ata a praza de Praterías, onde unha médico do Sergas deu lectura a un comunicado no que os facultativos censuraron a "desidia institucional que está a poñer en risco uno dos piares máis importantes da nosa sociedade: a nosa sanidade".
No manifesto cualificouse a folga dos médicos galegos como "un berro de auxilio de profesionais exhaustos", pero tamén "a voz dunha cidadanía que ve como o seu dereito a unha atención sanitaria digna pérdese entre listas de espera, demoras e consultas saturadas.
Mentres, os centros sanitarios galegos reorganízanse e estudan como compensar as citas afectadas polas protestas. En dúas semanas suspendéronse 43 mil consultas.
