Detido tras disparar tres veces contra outro home no barrio do Vinteún de Ourense

Nas próximas horas está previsto que pase a disposición xudicial un home detido en Ourense onte de madrugada tras un tiroteo no barrio do Vinteún. Está acusado de tentativa de homicidio. Disparou tres veces contra outro home tras unha liorta nun pub.  

O enfrontamento entre o acusado, ourensán de 33 anos, e a vítima, dominicano de 31 anos, comezou, ao parecer, nun local da rúa Ramón Cabanillas de Ourense.

Segundo informa o xornal La Región, o agora arrestado tentou arrebatarlle ao outro os cartos cos que ía pagar unha consumición. Tras un enfrontamento verbal, unha hora despois os dous volveron atoparse na rúa Río Arnoia, onde ten o seu domicilio a vítima. Segundo declarou esta, o detido estaba esperándoo no coche e disparoulle cunha pistola ata en tres ocasións, sen chegar a darlle.

Foron os veciños os que alertaron a Policía, que pouco despois detiña o presunto agresor, que foi identificado pola vítima e conta con numerosos antecedentes policiais. Foi trasladado aos calabozos da Policía Nacional no barrio das Lagoas, á espera de ser posto á disposición xudicial.