Os maiores de 74 anos que usan Internet duplícanse en catro anos en Galicia

O uso de Internet entre as persoas maiores de 74 anos en Galicia pasou do 17,6% en 2021 ao 34,5% en 2025, o que supón case duplicar o número de internautas desta franxa de idade e a incorporación á rede de 67.483 persoas máis.

No grupo dos 65 a 74 anos o incremento foi do 44,1%, o que implica preto de 80.000 novos usuarios de internet.

Son datos recolleitos no informe Seniors Dixitais. Edición 2025, publicado polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega).

O estudo constata a incorporación das persoas maiores á sociedade dixital, cun maior uso dos servizos electrónicos e con fogares que melloran o seu equipamento e a calidade das conexións.

O teléfono móbil continúa sendo o dispositivo máis utilizado: emprégano o 82,6% das persoas de 65 a 74 anos e o 44,1% das maiores de 74. Tamén avanza o uso das tabletas, que alcanza o 21,1% e o 7,8%, respectivamente.

Entre os servizos dixitais máis empregados destaca o uso da administración electrónica, á que acceden o 70% dos internautas de 65 a 74 anos e o 53% dos maiores de 74.

Outro dato recolleito no informe Seniors Dixitais. Edición 2025 é que preto do 35% das persoas 65 a 74 anos que usan Internet é para compras en liña, e a banca electrónica e a cita médica en liña consolídanse entre os servizos dixitais máis empregados.

Así mesmo, destaca que o 83,9% dos internautas de 65 a 74 anos e o 79,2% dos maiores de 74 realizan chamadas e vídeochamadas. A lectura de noticias en liña tamén presenta unha participación elevada, do 78,5% e do 60%, respectivamente.

O 68,2% entre os internautas de 65 a 74 anos e o 47,8% entre os maiores de 74 empregan a banca electrónica, e a cita médica a través dunha web ou unha aplicación é o recurso habitual para o 58% e o 43,5% destes grupos de idade.