Dous detidos en Bertamiráns por un presunto delito de homicidio en grao de tentativa

Axentes da Garda Civil de Santiago de Compostela detiveron un home e unha muller como presuntos autores dun delito de homicidio en grao de tentativa en Bertamiráns, no termo municipal de Ames.

A investigación iniciouse por mor do apuñalamento dun home o pasado 19 de febreiro a última hora da tarde no parque Pazo da Peregrina desa localidade, lugar de esparexemento frecuentado por menores e as súas familias.

No transcurso da investigación, os efectivos da Policía Xudicial pescudaron que o apuñalamento veu precedido dunha discusión entre a detida e un home.

Nun momento da mesma, a muller chama a outro home, encerellándose ambos os homes nunha pelexa a puñadas, uníndose posteriormente á pelexa a detida, o fillo desta e outra persoa.

Segundo informa a Garda Civil, durante a agresión a muller cravou á vítima un coitelo de cociña varias veces no tórax, tras o que os catro fuxiron do lugar, quedando o home tendido no chan, sangrando abundantemente.

Instantes despois, chegaron ao lugar unha patrulla da Policía Local de Ames e outra da Garda Civil alertados polos veciños, e procederon a taponar as feridas ata a chegada dos servizos médicos que o trasladaron ao Complexo Hospitalario Universitario de Santiago de Compostela.

Como froito da investigación, os axentes lograron a identificación dos agresores, sendo as catro persoas coñecidos das forzas de seguridade por ilícitos de diversa índole.

A Garda Civil procedeu á detención da muller e do seu fillo como presuntos autores dun delito de homicidio en grao de tentativa, e iniciaron un dispositivo de localización dos outros agresores.

Os detidos, xunto coas actuacións realizadas, foron postos ao dispor da autoridade xudicial de Santiago de Compostela, que decretou o seu ingreso en prisión. Os outros dous implicados quedaron en liberdade con cargos.