Os tomates da "Horta das cores" gañan presenza nos restaurantes máis exclusivos de Santiago

"Hai moitas variedades dos Estados Unidos, algunha de Austria, Polonia, Rusia e o Xapón.", di Roberto Couto.

No seu horto en Santiago medran 500 tomateiras de 50 variedades que foi conseguindo ao longo de máis dunha década de dedicación. A maioría das plantas están nos seus catro invernadoiros pero tamén experimenta ao aire libre.

 

"Empecei a recompilar sementes de distintas partes do mundo, facendo a miña propia colección. Non é que a miña intención sexa ter un récord Guiness de variedades, todo o contrario, ter algunhas variedades que me gusten e conservar esas variedades. Eu en sementes podo ter setenta variedades, este ano puxen cincuenta pensaba poñer moitas menos pero así empezou o tema", comenta.

O interese polos tomates prendeu neste enfermeiro compostelán cunha sementes da variedade laranxa de Bélxica que lle regalaron. Formouse de xeito autodicta no cultivo ecolóxico e nos coidados que necesitan as súas tomaterias, entre elas, a máis preciada do mercado.

"Este é un tomate xaponés que se chama Amela, cando está maduro ten un sabor moi cítrico, moi afrutado,  que case non recorda un tomate. o característico deste é que é o máis caro do mercado pero para gustos...", explica Roberto.

Este ano di que a colleita vai ben. Recolle uns cen quilos á semana que el mesmo distribúe en restaurantes da cidade.

"Animáronme a seguir con este proxecto e co boca a boca fóronse interesando máis establecementos", di.

Na próxima sementeira , este horticultor afeccionado quere moderar a plantación pero nunca se sabe porque comezou tamén a experimentar con pementos. Toda a información desta aventura na terra está tamén en Instagam en   "A horta das cores"