Os profesionais da enfermería reinvidican máis participación na xestión sanitaria

Á hora de pasar por calquera centro sanitario, o papel da enfermería determina a valoración do paciente que adoita manter un vínculo moi especial cos profesionais desa especialidade. Pero no Día Internacional da Enfermería, enfermeiras e enfermeiros din que este recoñecemento social non se corresponde coas eivas que aínda topan dentro do ámbito sanitario, segundo a presidenta do Colexio de Enfermería de Lugo, Eva Gómez.  

"Recoñecer a súa capacidade cientifica, asistencial, docente, investigadora e tamén xestora. Estamos atopando eses teitos de cristal, eses topes que nos poñen". 

Os usuarios xa recoñecen o seu papel central no sistema sanitario, pero ven tamén a súa precariedade e a sobrecarga laboral. Desde os colexios de Enfermería defenden que estas e outras cuestións se poderían mellorar contando máis coa súa profesión á hora de xestionar.

"Cando unha enfermeira coordina, decide, innova, lidera, non só gaña a profesión de enfermeira, senón todo o sistema sanitario".