Os presuntos ladróns de dúas cafeterías do centro da Coruña están pendentes de xuízo

Rebentaron cunha tapa da rede de sumidoiros a porta acristalada desta cafetería do centro da Coruña. Pasaban poucos minutos das doce e media da noite do mércores ao xoves. Un dos ladróns agardaba na rúa vixiando, mentres o outro se dispuña, sen éxito, a entrar no local. E é que, tras o forte impacto, saltou a alarma e activou unha bomba que encheu de fume toda a cafetería. Daquela, os delincuentes fuxiron cara a outro negocio do paseo das Pontes, onde actuaron do mesmo xeito.

"Romperon a cristaleira e polo burato un entrou e saíu polo mesmo sitio", explica Aurora Recarey, propietaria de Le Bistro.

Xa no interior, o ladrón foi directo a un caixón onde cría que había cartos.

"Era un caixón onde meto as moedas estranxeiras que me dan por equivocación. E, por non tiralas, métoas aí. O peor foron os danos materiais", engade a dona do local.

Con todo, os dous delincuentes non chegaron moi lonxe. A escasos metros foron prendidos pola Policía Nacional.

"Estaban aí, no parque, esposados. A Policía xa os viña seguindo desde o outro local no que tamén rebentaron a porta. E onte xa puxen a denuncia", conclúe Recarey.

E agora están pendentes de xuízo.