Mariscadores da ría do Burgo piden non sementar ata arranxar deficiencias dos traballos de rexenaración

A finais deste mes rematan as obras de rexeneración ambiental na ría do Burgo, e a empresa encargada da dragaxe xa comezou coas probas para a sementeira de cría de marisco. Unha actuación que non conta co apoio dos propios mariscadores porque din que o terreo aínda non está preparado.  

Imaxes gravadas polos mariscadores que traballan na ría do Burgo recollen o momento en que técnicos da concesionaria encargada da dragaxe comezan a botar a auga dende unhas tubaxes ás primeiras crías de bivalvos para que os bancos volvan ser produtivos.

O Goberno central, que foi quen promoveu os traballos, insiste en que son probas á espera de que Xunta dea as autorizacións definitivas para a sementeira.

"Estamos á espera de quen é a Administración competente..., que os técnicos competentes nos dean as autorizacións e determinen se efectivamente é o momento de plantalos e dicir cal vai ser o sistema de plancto", di Pedro Blanco, delegado do Goberno en Galicia.

Pero a Xunta denegou este permiso porque considera que os bancos marisqueiros aínda non están en condicións. E os mariscadores tamén apoian esta decisión. Manuel Baldomir, presidente dos mariscadores da ría do Burgo pide á Xunta que non recepcione a obra con esas irregularidades que hai que resolver.

O informe vai avalado polo biólogo da Consellería do Mar e entenden tamén que deben eliminar montículos de pedras que poden ser prexudiciais para a navegación e asentar os terreos porque deixaron montículos de area.

O 26 de abril rematan as obras de dragaxe e din que a partir desa data quedarán sen cobertura. Seguen á espera de que o Goberno se reúna con eles e o que piden son garantías de que a partir desa data seguirán percibindo as axudas, porque calculan que ata que os bivalvos acaden un tamaño comercial poderían transcorrer dous anos máis.