Os hoteis do Grove están case cheos con estadías que se alongan ata os quince días

Despois do mellor mes de xuño en número de visitantes nos últimos anos, os hoteis do concello do Grove traballan coa previsión dunha ocupación media para xullo e agosto de ata un 80% e non descartan colgar o cartel de non hai cuartos con reservas de última hora.

O turismo neste concello das Rías Baixas ten por estandarte as praias de bandeira azul, o turismo termal de luxo na Illa da Toxa, o marisco e a tranquilidade aínda que isto minguou no último lustro.

Cóntannos desde hoteis de dúas e tres estrelas que desde hai uns cinco anos as estancias vanse alongando e xa hai moitos clientes que quedan no Grove ata quince días. Turismo de familias e de parellas en todo o estado español que chegan ata aquí no seu propio vehículo.  

Os hoteis do concello do Grove roldan o 70% da ocupación hoxe e chegarán a estar case completos nos meses de xullo e agosto. Turistas de toda España, en familia, con estancias de ata quince días. 

"Estamos en tendencia e subindo. Mellor que o ano pasado. O forte sempre é a segunda quincena de xullo e todo agosto. O que si notamos é que cada vez hai estancias máis longas e que a tempada tende a alongarse máis. Moitos españois, moita xente do sur de España. As estancias máis longas é da xente que fai máis quilómetros. Despois xente do norte, sobre todo no último minuto. E familias", conta Merecedes Padín, a directora do hotel Maruxía do Grove.

"Esta primeira quincena observamos que a xente reserva máis días. Hai xente incluso que permanece no noso hotel ata quince días. E tamén estancias de tres ou catro días cando antes eran dunha noite, incluso. Hai máis establecementos, non só hoteis e hostais, tamén apartamentos turísticos... e a xente busca O Grove pola tranquilidade e pola masificación que temos nos concellos veciños", explica Raquel Costa, a directora do hotel Montemar do Grove.

Clima agradable, gastronomía de dez e a tranquilidade de non ser O Grove, polo momento, un concello masificado no verán.