Os hospitaleiros do Camiño Portugués esperan outro recórd de peregrinos este 2026

Ao redor de 70 persoas asisten en Pontevedra ao encontro anual de hospitaleiras e hospitaleiros do Camiño Portugués a Santiago. É unha xuntanza que se celebra con periodicidade anual e que vai xa pola vixésimo quinta edición.

Intercambian experiencias sobre a acollida de peregrinos no traxecto que vai de Lisboa a Santiago, que é o que máis medra.

"Para nós é un obxectivo máis que numérico. Queremos máis peregrinos, que todos se sintan ben acollidos, que gocen da experiencia de Galicia e que repitan. Para iso é moi importante o labor dos hospitaleiros, que lles fan a vida máis fácil aos peregrinos ao longo de todo o percorrido", explica Marcos Gómez Román, comisario do Xacobeo 27.

No que vai de ano, xa son máis de 185.000 os peregrinos que viaxaron a Santiago polas dúas rutas existentes desde Portugal. Os hospitaleiros contan que este vai ser outro ano de récord, con máis de 200.000 peregrinos.
 

"O xacobeo non sería un éxito nin unha historia de éxito se non fose pola base do camiño, por esas esencias que queremos preservar. Moitas veces facemos un símil entre o Camiño e o Xacobeo que é Galicia; queremos ser respectuosos coas nosas esencias, coas nosas orixes, e ao mesmo tempo seguir medrando de forma sostible. Nesa liña vai ir o Xacobeo 27 tamén", anuncia Marcos Gómez Román, comisario do Xacobeo 27.

Na reunión de Pontevedra, falan tamén das posibilidades de acoller os grupos moi numerosos de peregrinos que esperan para o Ano Santo.