Extinguido o incendio de Ourol tras arrasar máis de 70 hectáreas

O incendio forestal declarado o pasado martes ás 17:00 horas na parroquia de Merille, no concello de Ourol, quedou extinguido pouco antes das 16:30 horas deste sábado.

Segundo informa a Consellería do Medio Rural, as lapas arrasaron unha superficie próxima ás 72 hectáreas, de acordo coas estimacións provisionais.

Para a extinción do lume mobilizáronse ata o de agora, de xeito acumulado, 2 técnicos, 50 axentes, 66 brigadas, 53 motobombas, 4 pas e 2 helicópteros.

Teléfonos de atención

A Consellería do Medio Rural lembra que está a disposición da cidadanía o número de teléfono gratuíto 085 e a aplicación móbil ALume para avisar en caso de incendio forestal.

Do mesmo xeito, existe outro teléfono (900 815 085) para denunciar calquera actividade delituosa incendiaria da que se teña coñecemento ou sospeita.