A TVG lidera a audiencia coa retransmisión dos Fogos do Apóstolo

Máis de tres mil quilos de pólvora encheron de cor esta noite unha cidade, Santiago, cun intenso espectáculo de Pirotécnica do Mediterráneo con moito ritmo, sen pausas, e cun total de 23 pases de menos dun minuto cada un.

Os Fogos de altura, como se denominan e que foron deseñados especificamente para a ocasión, foron enviados ata a 130 metros de altura nunha noite totalmente despexada. O espectáculo puido verse en directio na Televisión de Galicia

A noite culminou coa conexión en directo cos tradicionais Fogos do Apóstolo desde tres escenarios emblemáticos de Compostela: a Alameda, a Cidade da Cultura e o parque de Carlomagno. O final, unha choiva de estrelas, foi quizais o máis vistoso, segundo a opinión maioritaria dos asistentes.

Tras a explosión de cor, este venres, 25 de xullo, Día de Galicia e festividade do patrón de España, converxerán en Compostela actos relixiosos, turísticos, políticos e institucionais, coa presenza do presidente da Xunta, Alfonso Rueda, como delegado rexio.

Líder de audiencia

O programa “Fogos do Apóstolo” da TVG foi a emisión audiovisual con máis audiencia de toda a programación que se puido ver en Galicia ao longo do día ao contar cunha audiencia media de 156.000 telespectadores durante cada minuto da súa emisión.

A súa cota de pantalla foi dun espectacular 28,5%, acadando 20,3 puntos de cota máis que La1 (8,1%), o seu competidor máis próximo durante a súa emisión, (23:29 a 23:50).