Os estafadores do xel hidroalcólico evitan a prisión tras un acordo de conformidade

O fiscal pedía nas conclusións provisionais máis de oito anos de cárcere para cada un dos dous homes que, en plena pandemia, traficaron cun produto a base de augardente como se fose xel hidroalcólico.

O acordo de conformidade a que chegou a defensa e o fiscal propiciou unha sentenza condenatoria polos delitos de estafa e contra a saúde pública, pero cunhas penas que ao final se converten en multa de 1.440 euros a cada un e dous anos de suspensión para actividade con produtos sanitarios nun período de trinta meses.

Ademais, nos dous próximos anos non poden incorrer en ningún delito. En caso contrario, cumprirían penas de prisión de 21 e 6 meses cada un. Os dous admitiron os feitos e indemnizaron cun total de 3.718 euros as reclamacións das vítimas da súa estafa.

En plena pandemia e co xel hidroalcólico escaseando, produciron e venderon varios miles de litros dun produto que, con pouca cantidade de etanol e moita de augardente, colocaban como desinfectante e eliminador de virus. Elaborábano de modo totalmente clandestino nunha nave avícola de Boiro e vendíano en farmacias e noutros establecementos.

A Garda Civil descubriu no rexistro efectuado no verán de 2020 6.400 litros do produto que os agora condenados facían pasar por xel hidroalcólico.