Unha médica do hospital Álvaro Cunqueiro acepta un ano e un mes de cárcere por falsear receitas

Unha médica que traballaba no servizo de Urxencias do hospital Álvaro Cunqueiro de Vigo aceptou un ano, un mes e 15 días de prisión por falsificar unhas receitas utilizando un talonario dunha compañeira sen o seu permiso.

A vista de conformidade celebrouse este martes na sección quinta da Audiencia Provincial de Pontevedra, con sede na cidade olívica, e tívose en conta as atenuantes de alteración psíquica e de reparación do dano, xa que pasou os 3.000 euros de responsabilidade civil. Ademais, impúxoselle unha multa de 555 euros e un ano de inhabilitación.

Segundo consta no escrito de acusación pública, os feitos ocorreron o 6 de decembro de 2023, cando a acusada estaba a traballar e, aproveitando que a súa compañeira se ausentara momentaneamente, colleulle da mochila o seu talonario de receitas e o seu selo oficial.

Así, retirou varias fichas e selounas, e despois cubriunas con prescricións de varios medicamentos e asinou, aparentando que foran expedidas pola súa compañeira. Posteriormente, retirou os medicamentos nun par de farmacias.

A Fiscalía fai constar que a acusada está diagnosticada dun trastorno de personalidade con síntomas de TDHA "de moderada relevancia", o que limita a súa capacidade volitiva, aínda que non a súa capacidade cognitiva.

Por estes feitos, acusábaa dun delito continuado de falsificación de documento oficial e pedía unha pena de 3 anos e 6 meses de prisión e de 3 anos de inhabilitación para exercer as súas funcións de médico. Con todo, tras chegar a unha conformidade, a pena rebaixouse en ambos os casos.