Acepta dez meses de prisión por insultos racistas a unha menor nun bus de Vigo: "Parece que vou en patera"

Un home acusado dun delito contra os dereitos fundamentais e contra a integridade moral aceptou 10 meses de prisión por insultar a unha menor que viaxaba no mesmo bus urbano que el en Vigo, e por proferir expresións como "parece que vou nunha patera".

Así se acordou nunha vista de conformidade celebrada este martes na sección quinta da Audiencia Provincial de Pontevedra, con sede na cidade olívica, en que o acusado se recoñeceu autor dos feitos.

Segundo se recolle no escrito de acusación de Fiscalía, os feitos remóntanse ao 4 de agosto de 2025 cando o procesado e a vítima viaxaban a bordo da liña 11 de autobús urbano de Vigo. Durante o traxecto, o home comezou a proferir insultos cara á moza, que era menor e á que non coñecía previamente. En voz alta, para que puidesen oílo todos os usuarios, insultouna reiteradamente pola súa cor de pel, dicindo que parecía que viaxaba "nunha patera" e ameazando con "chamar á policía" por ter que "viaxar nestas condicións".

Tras apearse do autobús, continuou insultando a moza mentres a sinalaba co dedo. O Ministerio Público pedía inicialmente a pena de ano e medio de prisión, pero tras o acordo, o acusado recoñeceu os feitos e aceptou 10 meses de cárcere, ademais do pago dunha multa de 1.080 euros.

Tamén se lle impuxo durante 4 anos e 4 meses a inhabilitación para exercer oficio educativo no ámbito docente, deportivo ou de tempo libre, e deberá indemnizar á vítima en 2.000 euros polos danos morais.

A pena de prisión quedou suspendida durante 3 anos, a cambio de que o procesado non delinca nese tempo e se someta a un programa de igualdade de trato, non discriminación e prevención de comportamentos violentos.