Os empregados dunha entidade bancaria de Ourense frustran un roubo reducindo o ladrón
O atracador achegouse cunha pistola, que, posteriormente, se confirmou que era simulada
Os empregados non chegaron a darlle os cartos e conseguiron reducilo ata que chegou a Policía Nacional
A Policía Nacional de Ourense detivo un home que pretendía atracar unha sucursal bancaria. Os propios empregados desta entidade frustraron o roubo.
Ataviado cun chaleco reflector, que levaba por riba dun mono azul, achegouse ao mostrador, portando unha arma de fogo, e pediu o diñeiro da caixa.
Neste intento de atraco, axudouse dunha pistola, que, posteriormente, se confirmou que era simulada. Os empregados en ningún momento chegaron a darlle os cartos porque conseguiron reducilo ata que chegaron as patrullas da Policía Nacional.
Ata o lugar achegouse tamén unha ambulancia, xa que o suposto atracador no forcexo quedou ferido, para ser atendido no mesmo lugar dos feitos. Ningún dos empregados precisou asistencia sanitaria, a pesar do susto e dos momentos de tensión que viviron.
Moitos veciños e veciñas da zona estaban sorprendidos. Esta avenida de Zamora de Ourense é unha zona con moito movemento de xente, e aseguran que é moi tranquila.
O home saíu desta sucursal bancaria xa como detido por un intento de roubo. Está en dependencias da Policía Nacional á espera de pasar a disposición xudicial.
