Os danzantes da aldea limiá das Lamas manteñen viva a tradición
Acompañaron a procesión da Santa Cruz cos seus bailes aprendidos de xeracións anteriores
A tradición perdérase durante anos pero a veciñanza conseguiu recuperala a comezos dos oitenta
Son oito danzantes, todos homes, tradicionalmente solteiros, os que bailan diante da imaxe da Santa Cruz e da Virxe no seu traslado da igrexa á capela das Lamas.
Amenizan o percorrido con seis danzas diferentes nas que empregan castañolas, paus ou o entrelazado. Ensaian a diario dende o comezo da novena aínda que coñecen os bailes dende pequenos e algún xa leva máis de dúas décadas danzando.
Descoñécese a orixe desta tradición pero os bailes gardan semellanza coas danzas gremiais, propias do medievo, que perviven noutras zonas de Galicia.
Nesta aldea de Xinzo chegaron a desaparecer durante anos ata que en 1981 os veciños decidiron recuperar esta tradición ligada á celebración das festas da Santa Cruz o primeiro domingo de maio.
Dende aquela, os danzantes non faltaron á súa cita nunca, agás na pandemia.
