A onda de calor deixa temperaturas superiores aos 40 graos en varios puntos de Galicia

A onda de calor que comezou o pasado venres e que ocasionou que se elevase ao nivel 3 de alerta en diversas áreas da comunidade galega, deixou temperaturas superiores aos 40 graos en varios puntos de Galicia, chegando mesmo aos 41.8 en Leiro (Ourense).

A temperatura récord desta calorosa xornada, segundo os valores recolleitos por Meteogalicia, rexistrouse no concello ourensán de Leiro, ás 16:10 horas, cando os seus termómetros chegaron aos 41.8 graos.

A provincia ourensá alcanzou as temperaturas máis altas de Galicia, cos 41.2 graos de Ourense cidade ou os 40.4 graos de Arnoia.

Unhas temperaturas bastante elevadas que tamén se viviron durante a xornada na provincia veciña, na de Lugo, xa que Pantón rexistrou 40.5 graos e Ribas de Sil chegou aos 40.2 graos.

Para este martes, espéranse máximas de máis de 36 graos na zona sur de Ourense, así como na zona noroeste da provincia e no sur de Lugo, mentres que na zona do Miño en Ourense os termómetros superarán os 39 graos de máxima.

Meteogalicia lembrou a necesidade de pasar polo menos dúas ou tres horas ao día nun lugar fresco, refrescar e mollar o corpo varias veces ao día, evitar saír nas horas de maior risco, 11:00 a 21:00 horas, e beber moita auga no caso de nenos e adultos, mentres que no caso dos anciáns, litro e medio de auga ao día.