Os criadores de razas galegas lembran no Día Mundial dos Animais que están en perigo de extinción
Teñen menos do 25 % de exemplares que precisan para abandonar o risco
Piden que a sociedade valore o seu traballo, tradición e coidado ambiental
Agás a vaca rubia, todas as razas autóctonas galegas están en perigo de extinción. Once en total. Cinco de vacas ourensás, porco celta, ovella e cabra, cabalo de monte, galiña de Mos e can de palleiro. No Día Mundial dos Animais, os criadores destas especies queren lembrar que constitúen un patrimonio natural que poboa Galicia dende hai séculos e que é preciso implicarse na súa conservación.
Todas estas razas contan con menos do 25 % de reprodutoras que serían necesarias para saír do perigo de extinción. Cada ano aumentan os censos pero o obxectivo está lonxe. Os criadores lembran tamén que as razas galegas son esenciais para coidar o medio ambiente e manter os montes limpos. Por iso, piden que neste día non se pense só nas mascotas senón tamén no gando.
A escaseza de exemplares dalgunhas razas impide que se poidan facer investigacións xenéticas para a súa conservación.
