Os bombeiros dan por estabilizados todos os incendios de Cataluña

Os bombeiros da Generalitat dan por estabilizados todos os incendios de Cataluña e afrontan outra xornada complicada polas altas temperaturas e a escasa humidade.

Despois dunha noite de intenso traballo, os Bombeiros da Generalitat catalá conseguiron estabilizar os catro incendios declarados simultaneamente este mércores pola tarde.

Nas últimas horas quedaba estabilizado o de Guimerá, na comarca ilerdense do Urgell, e antes sucedía o mesmo cos de Gavá e Navarcles, ambos os dous na provincia de Barcelona, e o de Pla de Manlleu, na de Tarragona.

Tamén se conseguiron estabilizar os incendios de Sentmenat e o da comarca da Anoia, mentres que se mantén en fase de control o do macizo xerundense de Les Gavarres despois de queimar máis de 2.000 hectáreas.

Protección Civil levantou xa o confinamento de 16.000 veciños que residían en zonas próximas aos lumes.

Na veciña comunidade autónoma de Aragón, continúa activo o incendio declarado na comarca oscense de La Llitera, que obrigou a confinar durante varias horas o concello de Albelda. A superficie queimada é de cen hectáreas de terreo agrícola e monte baixo. Na extinción do lume participa persoal das diferentes administracións públicas.