Publicador de contidos

Publicador de contidos

Os tractores franceses bloquean oito autoestradas no intento de evitar a entrada a París

Os tractores franceses bloquean oito autoestradas no intento de evitar a entrada a París

Bruxelas pide novas explicacións a Francia polo bloqueo de camións españois

Macron reúne un gabinete de crise

Transportistas galegos critican a violencia que sofren en Francia mentres tratan de esquivar os piquetes

G24.gal 29/01/2024 16:42 Última actualización 29/01/2024 21:03

Os agricultores concretaron esta tarde a súa ameaza de proceder a un 'asedio' a París con bloqueos nalgúns dos grandes eixos de acceso á capital. Mentres, o presidente, Emmanuel Macron, reúne un gabinete de crise.

En liña co que anunciaran dúas das grandes organizacións do sector, a Federación Nacional  de Sindicatos de Explotadores Agrícolas (FNSEA) e os seus socios dos Xóvenes Agricultores (XXAA), columnas con centos de tractores comezaron os bloqueos a partir das 14:00 hora local (13.00 GMT). Hai polo menos oito cortes de autoestradas e estradas na rexión.

O ministro de Interior, Gérald Darmanin, xa advertía o domingo de que as forzas da orde non van impedir os bloqueos de vías arredor de París, mentres se respecten "os bens e as persoas". Con todo,  sí que intervirán se os tractores tratan de entrar en París, bloquear París ou os aeroportos da capital (Orly e Charles de Gaulle).

Así mesmo, unha unidade antidisturbios da Xendarmería con varias tanquetas tomaba posicións xa esta mañá en torno ao mercado de abastos de Rungis, o máis importante de Francia.

Novas medidas do Executivo dende este martes

O primeiro ministro, Gabriel Attal, celebrou este luns unha reunión cun grupo reducido do Goberno.

Ao final da xuntanza, a voceira do Executivo, Prisca Thevenot, anunciou que haberá novos anuncios xa desde este martes e nos próximos días.

Os líderes dos principais sindicatos agrícolas reuníronse esta noite con Attal no Palacio de Matignon nun intento de avanzarlles algunhas das novas medidas.

Paralelamente ás medidas nacionais, o Elíseo dixo este luns que o presidente Emmanuel Macron exporá á presidenta da Comisión Europea, Ursula von der Leyen, unha serie de cambios na política agraria común, en particular sobre a obriga de deixar en barbeito un 4% das súas terras.

Ademais, Francia tamén quere poñer límites á entrada de certos produtos ucraínos, en particular pitos, ovos e azucre, que se autorizaron sen aranceis e sen as regras propias da UE como medida de apoio a Kiev pola invasión rusa de Ucraína.

Macron formulará estas peticións durante o Consello Extraordinario que terá lugar o vindeiro xoves en Bruxelas. 

Os transportistas galegos síntense "desamparados" fronte a esta situación

O certo é que está situación tamén está afectando aos transportistas galegos. Este luns, manifestáronse criticando a "violencia inadmisible" que sofren en Francia, indicando que "parece a lei da selva", pois desaloxan das súas cabinas aos condutores e "moven os vehículos ás cunetas".

O secretario xeral da Federación Galega de Transporte de Mercadorías (Fegatramer), Carlos García Cumprido, asegurou que os camioneiros galegos están a sufrir a violencia dos piquetes, con "camións rotos e condutores cansos ante a pasividade das autoridades francesas".

Indica que síntense "desamparados" e piden ao Goberno español que actúe, de xeito que a "libre circulación" estea garantida na Unión Europea. Segundo el, xa son varias as empresas da comunidade as que avisaron de que están a ser vítimas de ataques en Francia.

Algúns condutores foron expulsados dos seus camións, do mesmo xeito que a súa mercadoría. Mentres, outros quedáronse parados nas autoestradas sen poder moverse e coas áreas de servizo a uns 10 quilómetros de distancia.

"É un problemón e hai un deixamento e unha actitude contemplativa por parte da policía francesa", lamentou García Cumprido.

O secretario xeral explicou que as principais vías que cruzan Francia están cortadas e son as estradas que se usan para repartir os produtos galegos polo resto do continente.

Pola súa parte, o conselleiro de Medio Rural, José González, referiuse á esta situación. En palabras aos medios de comunicación, González tachou de "inaceptables" as declaracións do primeiro ministro galo, Gabriel Attal, quen denunciou "competencia desleal" por parte de países da Unión Europea, como España ou Italia.

Para garantir a soberanía alimentaria e a subsistencia dos agricultores e gandeiros, o conselleiro pediu ao ministro de Agricultura, Pesca e Alimentación, Luis Planas, que rexeite as palabras do mandatario francés.

 

A pasada semana anunciáronse unhas medidas consideradas insuficientes polos sindicatos

O primeiro ministro francés anunciaba o pasado venres unha serie de medidas en favor dos agricultores, que os principais sindicatos consideran insuficientes e que lles levaron a aumentar a presión, logo dunha breve tregua durante a fin de semana,

Fesneau avanzou esta mañá que o Executivo está a preparar outras medidas que se anunciarán en 48 horas e que o presidente francés incluíu na axenda do cumio europeo do próximo xoves esta crise da agricultura.

Bruxelas pide novas explicacións polo bloqueo de camións españois

 A Comisión Europea volveu a pedir explicacións a Francia polo bloqueo de estradas e os ataques dos seus agricultores contra os transportistas españois na fronteira con ese país, e avisou de que tomará medidas se é necesario.

A raíz dunha petición das autoridades españolas, o pasado 26 de xaneiro o Executivo comunitario solicitou ao Gobierno francés información sobre as perturbacións en estradas e autovías e sobre as medidas que prevé para facilitar a libre circulación de mercadorías no mercado europeo.

"A Comisión é consciente das queixas xeneralizadas na comunidade agrícola e está a traballar cos Estados membro e as partes interesadas para abordalas como unha prioridade. Con todo, isto non é escusa para obstaculizar ou destruír os produtos doutros agricultores doutros Estados membro", dixo este luns unha voceira do Executivo comunitario.

Lembrou que os tratados da UE obrigan os Estados membro para tomar "todas as medidas necesarias e proporcionadas para asegurar a liberdade de mercadorías no seu territorio" cando existe algún obstáculo.

"A Comisión avaliará a resposta de Francia e tomará as medidas apropiadas se é necesario", dixo.

É a segunda vez que a Comisión Europea pide explicacións ás autoridades francesas por este motivo en apenas medio ano, xa que en outubro pasado envioulles unha carta por incidentes similares en municipios próximos á fronteira española.

Naquela ocasión, estas responderon que adoptaran rapidamente as medidas necesarias para poñer fin aos actos de vandalismo que estaban a ocasionar danos.

Tamén sinalaron entón que a xendarmería francesa iniciara unha investigación a raíz das denuncias de varios condutores, segundo lembrou o comisario de Mercado Interior, Thierry Breton, nunha resposta publicada a principios de xaneiro a preguntas expostas por eurodeputados españois conservadores, socialistas e liberais.

Esta segunda chamada de atención prodúcese despois de que, tras semanas de protestas e ataques a camións estranxeiros, o primeiro ministro francés, Gabriel Attal, asegurase o domingo que poñerá en marcha "novas medidas" para contrarrestar o que ve unha "competencia desleal" por parte dos agricultores estranxeiros que venden en Francia.

Bruxelas, con todo, prefire non conxecturar sobre a que se refería exactamente o primeiro ministro francés ao falar dunha suposta competencia desleal por parte doutros Estados membro da UE, pero inclínase a pensar que se refería aos diferentes regulamentos nacionais na materia, por exemplo, de uso de pesticidas.

Nesta liña, desde o Executivo comunitario insístese en que non hai un ángulo específico en materia de lexislación de competencia nas palabras de Attal, como sucedería se as críticas se referisen á existencia de axudas públicas desorbitadas para o sector agrario.

Publicidade
Publicidade
Publicidade
Publicidade
Pódeche interesar