Orio amósase imparable e Chapela remata de quinta no Campionato de España de traiñeiras
Arraun Lagunak impúxose a Tolosaldea na categoría feminina e Samertolameu gañou o título en veteranos
Orio está imparable neste comezo de temporada de traiñeiras. Gañou o Campionato de Guipúscoa, o de Euskadi e impúxose en Castro Urdiales no Campionato de España. Un título que non lograba desde había 26 anos e que demostra a ambición do proxecto desta temporada con novo adestrador -Íker Zabala- e unha chea de fichaxes de renome que o converten no favorito para gañar todos os títulos neste 2025.
Sacoulle cinco segundos a Ziérbena, adestrada polo galego Dani Pérez Fandiño, e 16 a Donostiarra. Chapela, a única traiñeira galega que participou na categoría sénior, acabou no quinto posto a 55 segundos da gañadora.
Na categoría feminina a vitoria foi para Arraun Lagunak. As dominadoras en 2024 (Campionato de España, Liga Euskotrén e Bandeira da Concha) repiten no estatal neste 2025 nunha dura loita con Tolosaldea que viña de gañarlle o Campionato de Euskadi.
Unha das novidades deste ano foi a inclusión da categoría de veteranos. Aí tivemos vitoria galega con Samertolameu de Meira facendo o mellor tempo na liña de meta. Cabo da Cruz levou a medalla de bronce.
