Brillante sexto posto de Ares na Bandeira de Sestao
Ares só foi superada polas embarcacións da quenda de honra e Hondarribia
Cabo da Cruz foi o penúltimo e pecha a clasificación da Liga ACT
Orio conseguiu a segunda vitoria en dúas regatas
Arraun Lagunak gaña na categoría feminina logo dun espectacular esprinte
Tras o oitavo tempo que fixera na contra o reloxo inaugural de Bilbao, Ares acadou un brillante sexto posto na segunda xornada, superando a seis embarcacións, nesta Bandeira de Sestao.
A estratexia entrou en xogo no campo de regatas situado na desembocadura do río Nervión. Correntes e vento influíron e as traiñeiras buscaban achegarse ao carreiro 4, onde saíu con forza e xa imparable Hondarribia na segunda quenda. Ares entrou entón en loita con Getaria.
A Santa Olalla tiña que aumentar o ritmo de pada e así o fixeron. Excelente reacción da tripulación galega no terceiro longo que non só conseguiu superar a Getaria e á descolgada Lekitarra, senón tamén mellorar o tempo das catro embarcacións da quenda anterior.
Ares rematou así a primeira semana de liga situándose no sétimo posto da clasificación xeral, co mesmo equipo co que ascendera a temporada pasada.
A táboa deixa no posto de pechacancelas a Cabo da Cruz que viviu en Sestao a súa segunda proba de nivel. Este ano no que se presentan cun equipo remodelado e con pouca experiencia.
Cabo mudou dúas pezas da tripulación que onte fora penúltima en Bilbao. Hoxe rematou no mesmo posto, a dez segundos do décimo. Co handicap de que saíron na primeira quenda, a que máis influencia das correntes sufriu.
