España reacciona cun amplo triunfo na segunda xornada do Eurobasket

A selección española refíxose no Eurobasket, despois da dura derrota da xornada inaugural diante de Xeorxia. Contra Bosnia e Herzegovina, os de Sergio Scariolo melloraron nas dúas zonas, e non lle deron opción áos seus rivais para sumar un triunfo moi amplo, que os fai recuperar a moral, e tamén o basketaverage.

España desnivelou a contenda xa desde o inicio, cun parcial de 24-16 no primeiro cuarto que daba idea da súa seriedade defensiva. Aínda melloraron os de Scariolo no segundo: 20-14, e xa unha renda de 14 puntos ao descanso que lles permitía xogar con máis calma.

No terceiro cuarto a renda continuou medrando. 28 puntos anotaron os españois, por so 17 dos bosnios. No último, que tivo unha interrupción para reparar un dos taboleiros, os balcánicos aproveitaron a relaxación dos de Scariolo para levar un triunfo parcial por 16-20. Malia a isto, o 88-67 final relanza aos españois nas súas aspiracións de superar esta fase de grupos e seguir progresando no torneo.