Obras no túnel de Pedrafita causarán cortes de tráfico na A-6 durante o próximo mes
O Ministerio de Transportes vai realizar no túnel traballos de adecuación e renovación dos sistemas de drenaxe de verteduras tóxicas e da rede de protección contra incendios
Os traballos de adecuación e renovación dos sistemas de drenaxe de verteduras tóxicas e da rede de protección contra incendios no túnel de Pedrafita provocará cortes de tráfico durante o próximo mes.
Nun comunicado, o Ministerio de Transportes informa de: corte da calzada esquerda (sentido Madrid) da A-6 entre os quilómetros 431,2 e 432,2, desde as 8:00 horas do luns 27 de abril ata as 8:00 horas do 11 de maio; corte da calzada dereita (sentido A Coruña) da A-6 entre os quilómetros 431,2 e 432,2, desde as 8:00 horas do 11 de maio ata as 8:00 horas do 25 de maio.
En ambos os casos habilitarase un desvío alternativo pola N-VI, que inclúe a travesía de Pedrafita do Cebreiro. Todos os desvíos estarán convenientemente sinalizados.
O Ministerio de Transportes e Mobilidade Sostible avanza na execución das obras de mellora de varios túneles do porto de Pedrafita, entre os quilómetros 407,0 e 464,5 da autovía A-6 na provincia de Lugo (Cereixal, Doncos, San Pedro e Pedrafita) e na provincia de León (Trabadelo, A Escrita e Vilafranca).
A actuación no seu conxunto conta cun investimento de 24,7 millóns de euros (IVE incluído), dos cales 18,3 millóns proceden dos fondos europeos do Plan de Recuperación, Transformación e Resiliencia. Nesta partida inclúese a modernización do túnel de Montefurado na N-120. Os 6,4 millóns restantes destínanse a actuacións adicionais nos sistemas de ventilación.
