Obradoiro práctico sobre educación viaria para estudantes de secundaria de Ourense

Para concienciar da importancia de conducir respectando sempre as normas e con responsabilidade, o alumnado de secundaria de Ourense está a participar nuns obradoiros prácticos sobre educación viaria. Desta volta, déronse conta do perigoso que é coller o volante baixo os efectos do alcol grazas a unhas lentes de simulación.

Unha vivencia simulada que lles fai ver a estes alumnos e alumnas do instituto Otero Pedrayo de Ourense o perigoso que é guiarse coas capacidades e habilidades diminuídas. O obxectivo é que estes rapaces, condutores no día de mañá, sexan moi conscientes dos riscos que supón beber antes de conducir.

Pero eles a día de hoxe xa son protagonistas no ámbito viario como peóns, por iso lémbranlles que hai que cumprir as normas e practicar valores como o respecto. Esta actividade está organizada pola Concellería de Educación de Ourense, coa colaboración da Garda Civil e da Xefatura Provincial de Tráfico por unha seguridade viaria.