O xabaril arrasa 30 hectáreas de millo acabado de plantar nunha explotación de Guitiriz

Diego, propietario da explotación gandeira Portagándara de Guitiriz, amosa o desastre que xa lle comunicaron á Consellería de Medio Ambiente. O xabaril arrasou 30 hectáreas de millo en varias parcelas acabadas de sementar. Cóntanos que sementaron unhas 67 hectáreas a finais de abril e o porco bravo estrago totalmente as últimas parcelas onde plantaron.

Avalían as perdas nuns 6.000 euros, ademais de ter que volver sementar. Pero o que máis os incomoda é facelo coa inquedanza de que o porco bravo repita as andanzas.

Na fin de semana houbo unha batida de caza, pero Diego está convencido de que a solución á sobrepoboación de xabaril non pasa por estas medidas. Cre que o problema é máis complexo e ten máis que ver co abandono do rural: os montes non están limpos e favorecen a reproducción destes animais.