Veciños de Esteiro, en Muros, piden medidas para controlar os xabarís

Pola estrada pola que baixan as famosas carrilanas de Esteiro, fano tamén os xabarís. 

Veciños da Ribeira do Maio retrataron a súa última visita hai unhas tres semanas. Chegaron cando aínda había luz e acompañados de toda a familia.

Semella que perderon o medo e baixan buscar alimento fozando nas poucas leiras que aínda se traballan na zona.

Danos nos cultivos, nos peches e tamén preocupación para os condutores. Non moi lonxe deste lugar, Manolo desfixo o coche ao bater contra un.

Piden que as administracións competentes tomen medidas canto antes porque o problema, din, vai a máis.

Unha solución para evitar que se descontrole a poboación de porcos bravos e que imaxes así non se volvan producir.