A armadora do Pitanxo contrata os mariñeiros que desmentiron a versión de Samuel Kwesi
Nunha entrevista coa Televisión de Galicia, a defensa do grupo Nores aseguraba que testemuñas independentes que avalaban a súa versión fronte á de Samuel Kwesi
Agora sábese que a armadora contratou esas dúas persoas e que forman parte da tripulación do Villa Nores, xemelgo do Pitanxo, que acaba de regresar de Terra Nova
O arrastreiro Villa Nores, barco xemelgo e da mesma armadora que o Villa de Pitanxo, está desde este xoves no porto de Vigo. Regresou de Terra Nova, o mesmo caladoiro en que se produciu a traxedia, da que se cumprirá un ano en menos de dúas semanas: 21 falecidos, dos que tan só se recuperaron 9 cadáveres.
A Audiencia Nacional impútalles á armadora e ao patrón, Juan Padín, eses 21 presuntos homicidios imprudentes.
A chegada do Villa Nores a Vigo coincide coa confirmación dun dato moi revelador. Na única entrevista que ata o de agora deu a parte investigada no caso, Alberto Penelas, avogado de Padín e do Grupo Nores, adiantaba o pasado 12 de xaneiro que existían testemuñas independentes que avalan a versión do seus defendidos e contradín a de Samuel Kwesi, o mariñeiro que salvou a vida e propiciou toda a investigación que aínda está en marcha. Testemuñas de xente allea á empresa, dos barcos rescatadores, aseguraba o avogado do Grupo Nores.
Alberto Penelas referíase en concretro ao capitán e ao segundo de a bordo do pesqueiro portugués Virxe da Barca, que en efecto tomou parte nos labores de rescate. O que Penelas non dixo aquel día, pero o Galicia Noticias si puido confirmar por fontes fiables e alleas á causa xudicial, é que tanto un coma o outro están contratados nestes momentos por Nores.
Ata o punto de que os dous formaban parte da tripulación do Villa Nores, ese xemelgo do Pitanxo que acaba de regresar de Terra Nova esta mesma semana.
