O tamaño das tapas, motivo de conflito entre os hostaleiros

 "Indubidablemente que sempre se mira un pouco". "Si, a xente vai pola tapa, si, si". "Digamos que se vou e non ma poñen, non volvo". "Hai guerra entre os que poñen máis e menos". "Hai locais en que independentemente que ti non consumas outra cousa, séguenche traendo tapas", opinan clientes. 

A tapa é unha tradición, pero tamén un gancho para captar clientes, e isto está xerando moita controversia no sector sobre cal é o tamaño e cantidade adecuados para acompañar unha consumición.

 "Eu penso que é unha cousa de sentido común, se ti vas dar unha tapa moi xenerosa, pois case se considera unha ración, e entón habería que cobrala", explica Sara Santos, hostaleira.

 "Se a xente non consome as racións, ao final o que facemos é perder cartos", di Beatriz González, encargada dun local de hostalería.

Neste local de Santiago poñen como mínimo dúas diferentes por cada consumición.

"E a xente vai comida, con dúas tapas que poño vai, e ás veces repiten a consumición para repertirlle outras dúas tapas, é un gancho á parte que é un gasto, é un gancho, sen ela non fariamos nada", apunta Soledad Iglesias, hostaleira.

A moitos hostaleiros non lles saen as contas.

"Algo se ten que notar no balance da factura, e entón pois igual se lle quita calidade ao produto principal da comanda", continúa Sara Santos.

 "Se non lles resultase beneficioso economicamente, nin á hora de atraer clientes, non o farían, os establecementos tampouco son parvos e non van facer cousas que os poidan prexudicar", opina unha rapaza.

"Agora mesmo é difícil baixar, pero deberiamos, porque nos custa moito soster todo", remata Soledad Iglesias, hostaleira.