O éxito dos negocios multiverso: dun café-florería a un bar con supermercado ou que tamén vende roupa

Tomar un café no mesmo sitio no que podes encargar un ramo de flores. Pedir un bocadillo mentres mercas adornos de Nadal. Sentar a tomar un doce nunha tenda de roupa que vende tamén obras de arte. O multiverso é real no mundo dos negocios.

En Galicia funcionan locais que mesturan actividades dispares, moitas veces chocantes. Algúns son establecementos de toda a vida que foron ampliando servizos. Outros, novas iniciativas que apostan por combinar usos distintos nun mesmo espazo como fórmula para se diferenciar e se facer un oco no mercado. 

Porque ás veces, unha cousa atrae á outra. Esa foi a idea de Yuri, un emprendedor brasileiro que este ano abriu en Cangas unha cafetaría-florería. Chámase Pitanga e está na rúa Lirio, bonita coincidencia.

"Temos permiso de café-bar. Servimos viño, cervexa... e tamén flores, ramos, para tanatorios... todo", resume Yuri Valente, despois de poñer uns cafés e mentres prepara crisantemos para unha clienta.

Tamén está en Cangas o Bar Puri, aínda que a súa sona chega a todo o Morrazo. Metade bar, metade tenda, é unha empresa familiar -case corenta anos- á que acode xente en busca de calquera cousa e case a calquera hora, porque a zona de supermercado ten o mesmo horario que o café, así que abre ata as 23:30 e tamén domingos e festivos. 

"Se queren desaparafusadores, temos desaparafusadores; se queren adornos de Nadal, neste momento, pois temos adornos de Nadal; carne, polo... Temos un pouco de todo para que alguén saia do apuro", resume Purificación Pazó, a titular do negocio.

Cruzando a ría, atopamos en Vigo a versión máis moderna dun negocio híbrido. La Contenedora ofrece café e doces na entrada, vende roupa no interior, ten unha galería de arte ao fondo e conta cun espazo de traballo colaborativo no andar superior. Todo no mesmo local e da man da mesma parella que o rexenta.

"Como o seu nome di, contén dende o café a roupa de marcas nacionais. E tamén potenciamos os artistas locais", explica Leticia Rodríguez, que tamén organiza actividades culturais no establecemento.