Localizado en Cuba o profesor condenado a 13 anos de cadea por violar unha menor en Ourense

Martiño Ramos, profesor de música e exlíder de En Marea, condenado a 13 anos de cadea por violar unha menor en Ourense, estaría vivindo en Cuba desde o mes de xullo, segundo informa, nunha exclusiva, o diario El Español. Segundo este xornal, vive na Habana, faise chamar Martín Soto e traballa como fotógrafo.

Relata El Español que na capital cubana "móvese sen chamar a atención. Participa en pequenos talleres de fotografías, aparece en exposicións colectivas e frecuenta cafeterías do barrio de El Vedado", podemos ler no xornal, que xa non dá máis datos.

España non ten tratado de extradición con Cuba

A audiencia Provincial de Ourense condenou a Martiño Ramos Soto a 13 anos de cadea por abusar sexualmente e violar unha alumna menor de idade, coa que contactou por Instagram sen identificarse, segundo explica a Comunicación do Poder Xudicial. A sentenza coñeceuse o 19 e xullo de 2024.

A defensa recorre ao  Tribunal Superior de Xustiza de Galicia, que decretou a firmeza da sentenza de 13 anos de cadea o 25 de xullo. O 15 de setembro, a Garda Civil foille comunicar a desestimación do recurso perante o Tribunal Supremo, pero os axentes xa non o atoparon. Foi entón cando a Audiencia provincial de Ourense emitiu unha requisitoria de busca e captura e unha orde de detención e de ingreso en prisión.

Ata ese momento, Martiño Ramos Soto estaba en liberdade provisional. Sospéitase que saíu de España antes de que o Tribunal Supremo desestimase o seu recurso e despois da condena do Tribunal Superior de Xustiza de Galicia o 25 de xullo de 2025.

Se realmente é a persoa localizada en Cuba, a xustiza española non o ten doado para traelo de volta: España non ten tratado de extradición con Cuba.

Martiño Ramos, quen supostamente se fai pasar por un fotógrafo, Martín Soto, na Habana, Cuba