En busca e captura o profesor condenado por abusar dunha alumna en Ourense

A Audiencia Provincial de Ourense emitiu unha requisitoria de busca e captura e unha orde de detención e ingreso en prisión para o profesor condenado a 13 anos de cárcere por abusar sexualmente dunha das súas alumnas en Ourense, desde que esta tiña 12 anos e ata que fixo 16.

Segundo ratificou o Tribunal Superior de Xustiza de Galicia, o pasado 25 de xullo o Tribunal Supremo decretou a firmeza da sentenza despois de que o acusado presentase recurso, e o 15 de setembro notificouse ás partes. Foi entón cando, ese mesmo día,  se decretou a súa busca e captura e o seu ingreso en prisión. Así mesmo, segundo confirmaron fontes xurídicas próximas ao caso, cando se foi notificar ao acusado, este non se atopou.

O alto tribunal galego desestimou o recurso de apelación da defensa ao subliñar a "sólida e categórica persistencia na incriminación" do recorrente, os testemuños doutras alumnas e os informes forenses.

Así mesmo, a sala asegurou que o acusado "era perfectamente coñecedor da fraxilidade emocional da vítima" e aproveitouse desas circunstancias para presentarse como "unha figura de referencia e apoio".

Os feitos producíronse despois de que o condenado, de 45 anos, establecese unha conversación coa vítima a través dunha rede social usando un alias, para que esta lle enviase fotografías e vídeos íntimos. Tempo despois, tras a insistencia da vítima para que revelase a súa identidade, o condenado pediulle que fose á aula de música, descubrindo entón quen era.

A partir dese momento, o condenado conseguiu quedar con ela en varias ocasións, segundo indicaron os xuíces, e realizar actos sexuais coa menor. Nesta liña, o home someteuna a numerosos abusos e violacións, así como a "prácticas sádicas" e, nunha ocasión, propinoulle unha malleira e abandonouna no monte.