O servizo ferroviario entre Monforte e Lugo, interrompido esta fin de semana polas obras

O tráfico ferroviario de viaxeiros entre Monforte de Lemos e Lugo verase interrompido esta fin de semana, desde esta noite ata a madrugada do luns día 20 de decembro, debido ás obras de mellora que Adif realiza neste corredor. Renfe estableceu plans alternativos de transporte por estrada para os viaxeiros dos servizos afectados.

Adif acometerá durante estes días actuacións en infraestrutura (obras de drenaxe, pasos superiores, noiros de trincheiras e túneles) e en vía para permitir a electrificación deste tramo de 75 quilómetros de lonxitude.

Para realizar estes traballos, o servizo interromperase desde as 22:30 horas do venres 17 de decembro e ata a madrugada do luns 20, e afectará por tanto ás circulacións ferroviarias de viaxeiros do sábado 18 e o domingo 19 de decembro.

Melloras no trazado Ourense-Monforte de Lemos-Lugo

As actuacións de mellora que levan a cabo no tramo en servizo Ourense-Monforte de Lemos-Lugo teñen como obxectivo mellorar a fiabilidade, a confortabilidade e os tempos de viaxe.

Entre as principais actuacións previstas figuran a adaptación da infraestrutura ás novas condicións de explotación, o cambio de electrificación de 3 kV a 25 kV no tramo Ourense-Monforte e a electrificación a 25 kV do tramo Monforte-Lugo.

A electrificación do tramo Monforte-Lugo vai ser financiada pola Unión Europea cos fondos Next Generation.