O Sergas oferta 389 prazas nas oposicións que se celebran esta fin de semana
O Sergas oferta 389 prazas nas oposicións que se celebran esta fin de semana
Están convocados preto de 8.000 aspirantes
Este sábado ofértanse 251 prazas de pinche e de condutor
O domingo son 138 prazas de seis categorías
Nova fin de semana de oposicións ao Sergas en Silleda. O Servizo Galego de Saúde oferta un total de 389 prazas. Hai preto de 8.000 persoas convocadas.
Os aspirantes a acadar unha das prazas que oferta o Sergas esperaban diante das portas do recinto de Silleda con certos nervios. A entrada aos pavillóns comezaba ás nove e media da mañá. Íanse enfrontar a un exame de case dúas horas e cun cento de preguntas.
Este sábado están convocados, entre a mañá e a tarde, un total de 5.420 aspirantes para a cobertura de 251 prazas de pinche e de condutor.
O domingo continúan os exames. Uns 2.530 aspirantes están convocados para cubrir 138 prazas de calefactor, lavandeiro, logopeda, técnico superior de xestión de sistemas e tecnoloxías da información, e traballador social.
Coa realización destes exames avánzase nas probas selectivas para cubrir un total de 680 prazas de 24 categorías e especialidades, que se iniciaron a finais de abril e que continuarán a vindeira fin de semana.