Galicia suma un novo restaurante con Estrela Michelin e Retiro da Costiña, de Manuel García, consegue a segunda

Cargando resultados...

Galicia suma un novo restaurante con Estrela Michelin e Retiro da Costiña, de Manuel García, consegue a segunda

Publicador de contidos

O restaurante Simpar de Santiago logra a súa primeira estrela

En total son 17 os restaurantes galegos con estrela Michelin e tres deles con dobre distinción

Manuel Costiña, chef do Retiro da Costiña

G24.gal 26/11/2024 21:15 Última actualización 27/11/2024 17:11

Dúas estrelas Michelin recoñecen o labor que vén realizando en Santa Comba o restaurante Retiro da Costiña. Foi distinguido na gala celebrada este martes en Murcia, pouco tempo despois de recibir tamén o premio a mellor sobremesa de España.

Culminan así un 2024 moi especial no que o local cumpre 85 anos. Retiro da Costiña entra así no trío de restaurantes galegos con dúas estrelas, xunto a Culler de Pau no Grove e Camiño da Serpe, o restaurante de Pepe Vieira en Poio.

Distinguido xa cunha estrela Michelin desde 2008, Manuel Costiña únese a Javi Olleros e Pepe Vieira ao selecto grupo de cociñeiros galegos con dúas estrelas.

A outra novidade principal é que Galicia suma unha nova estrela Michelin: o restaurante Simpar, en Santiago de Compostela, con Áxel Smyth e Claudia Merchán. Smyth xa tivera a distinción co seu anterior proxecto Auga e Sal e agora repite na rúa do Vilar.

O Simpar, situado no número 47 da rúa do Vilar da capital galega, é o único establecemento de Galicia que se incorporou na nova Guía Michelin 2025. Recentemente logrou ademais ser distinguido como o restaurante que elabora os mellores callos de España.

Tal como destaca Michelin, os seus cociñeiros Áxel Smyth e Claudia Merchán defenden unha cociña "técnica e creativa", de raíces galegas, en constante evolución. "Os seus provedores teñen nomes e apelidos!", subliña.

Así que o balance son dezasete restaurantes en Galicia con estrela Michelin, e tres deles por partida dobre.

Para Serra de Outes foi unha distinción distinta: Estrela Verde para o Secadeiro, de Eva Guzmán e Fernando Rodríguez. Un galardón que recoñece os restaurantes máis comprometidos coa gastronomía sostible, cos produtos da terra e a cociña natural.

Do resto de España, foi protagonista Asturias, con casa Marcial, de Arriondas, como o novo restaurante con tres estrelas Michelin.

En total, son 291 os galardoados, apostando, principalmente, por cociñas innovadoras e todos referentes da gastronomía.

Áxel Smyth, do restaurante Simpar

Repiten na lista con dúas Estrelas Michelin Culler de Pau, do Grove, e Pepe Vieira, en Raxó, e únese agora Retiro da Costiña.

Ademais de Simpar, unha Estrela Michelin teñen en Galicia os restaurantes Maruja Limón, de Vigo; Silabario, de Vigo; Eirado, de Pontevedra; Yayo Daporta, de Cambados; Solla, de Poio; Árbore da Veira, da Coruña; As Garzas, de Malpica; A Tafona, de Santiago de Compostela; Casa Marcelo, de Santiago de Compostela; O Pazo, de Padrón; Terra, de Fisterra, e Nova e Ceibe, de Ourense.

Pola súa banda, o restaurante O Secadeiro, situado na Serra de Outes (A Coruña), conseguiu unha Estrela Verde, distinción que destaca as prácticas sostibles.

"Atesouramos un horto propio, cun pequeno invernadoiro, e calculamos que o 80 % dos produtos cos que traballamos veñen da nosa contorna. Poñemos o foco especialmente no mundo vexetal e recuperamos legumes autóctonos, como o Lentellón de Banzas", destacaron os seus chef Eva Guzmán e Fernando Rodríguez.

Listaxe completa

Este é a listaxe completa das novidades de España na guía Michelin 2025:

-3 ESTRELAS:

Casa Marcial (Arriondas, Asturias)

-2 ESTRELAS:

A Levante (Chiclana de la Frontera, Cádiz)

Lú Cocina e Alma (Xerez);

Retiro da Costiña (Santa Comba)

-1 ESTRELA:

Ama (Tolosa, Guipúscoa)

Ibai (Donostia, Guipúscoa)

Ricardo Temiño (Burgos)